大家習慣去Starbucks打書、傾計、hea足半日嘅「第三空間」，即將迎來大轉變！Starbucks中國正式確認，由聽日（星期四）開始，全國門店推行「消費入座」，店內會擺放提示牌提醒顧客，不過品牌強調唔係一刀切，執行上面會保留彈性同溫度，遇到孕婦、行動不便人士等有需要嘅人，都會酌情處理
早幾日網上已經瘋傳「消費入座」提示牌相片，當時傳言一出即刻登上微博熱搜，好多網民一時估估下，有消息曾經指傳聞未必屬實，等到今日官方先拍板落實呢個新安排。
消息一出，網上意見即刻兩極。好多人都大表支持，話成日遇見有人長時間霸住座位唔消費，想買杯咖啡坐低都冇位，新規可以保障消費者權益；但另一班網民就覺得唔係好接受，始終Starbucks一直主打「第三空間」，想打造一個屋企同辦公室以外、放鬆社交嘅地方，如果將座位同消費綁死，感覺打破咗多年以來大家同品牌之間嘅默契。
其實呢個都唔係內地獨有嘅操作，各地Starbucks都陸續為座位「設限」。香港方面，沙田新城市廣場同葵芳新都會廣場分店，早喺9月已經試行繁忙時段90分鐘堂食時限；韓國分店年初亦出新規，禁止客人帶大型電子器材例如打印機、拖板入店，減少長期駐店辦公、溫書霸位嘅情況。
背後原因其實唔難理解，租金、人工等經營成本不斷上漲，加上大量座位被長期佔用，昔日主打自由休憩嘅第三空間模式，愈來愈難維持。今次內地呢個新規，都算是品牌面對經營壓力之下嘅調整。
究竟大家覺得「買嘢先有得坐」合理嗎？係還座位俾真正消費嘅客人，定係打碎咗咖啡廳hea半日嘅浪漫？
Leave a comment